PIYUSH GAJJAR – VIRAMGAM
અમદાવાદ જિલ્લા સહિત રાજ્યભરમાં ગુજરાત ઇન સર્વિસ ડોક્ટર્સ એસોસીયેશન દ્વારા વિવિધ પડતર પ્રશ્નો અને માંગણીઓના ઘણા સમયથી ઉકેલ નહિ આવતાં આગામી તારીખ ૦૭-૦૪-૧૭ના રોજ સામુહિક પરચુરણ રજા ઉપર ઉતરી જશે તેવુ એલાન કરવામાં આવ્યુ છે. વિરમગામ તાલુકા સહિત અમદાવાદ જિલ્લાના ઇન સર્વિસ તબીબી દ્વારા સ્થાનિક ધારાસભ્યોને આવેદન પત્ર આપવામાં આવ્યા છે.
ગુજરાત ઇન સર્વિસ ડોક્ટર્સ એસોસીયેશન દ્વારા એક અખબારી યાદીમાં જણાવવામાં આવ્યુ છે કે, રાજ્યના પ્રાથમિક આરોગ્ય કેન્દ્રો, સામુહિક આરોગ્ય કેન્દ્રો, રેફરલ હોસ્પીટલો, સબ ડિસ્ટ્રીક્ટ હોસ્પીટલો, સિવીલ હોસ્પિટલો તથા વહિવટી અંકુશ હેઠળ ફરજ બજાવતા ઇન સર્વિસ તબીબોના વિવિધ પડતર પ્રશ્નો અને માંગણીઓનો હજુ સુધી ન્યાયી ઉકેલ આવ્યો નથી. ભુતકાળમાં ઇન સર્વિસ તબીબો દ્વારા જિલ્લા મથકો પર મૌન રેલી યોજીને પડતર પ્રશ્નોના નિરાકરણ માટે માંગણી કરવામાં આવેલ છે. તેમ છતાં પણ સરકાર દ્વારા કોઇ હકારાત્મક ઉકેલ આવ્યો નથી. ગુજરાત ઇન સર્વિસ ડોક્ટર્સ એસોસીયેશનના એલાન મુજબ રાજ્યના ગુજરાત ઇન સર્વિસ ડોક્ટર્સ આગામી તારીખ ૦૭-૦૪-૧૭ના રોજ સામુહિક પરચુરણ રજા પર ઉતરશે.
