ગરબાડા તાલુકાની ૨૨ ગ્રામ પંચાયતોની ચૂંટણીનું પરિણામ જાહેર

PRIYNK CHAUHAN GARBADA

  ગરબાડા તાલુકાની ૨૩ ગ્રામ પંચાયતોની ચૂંટણી યોજાનાર હતી પરંતુ માતવા ગ્રામ પંચાયત સમરસ થતાં ૨૩ માંથી ૨૨ ગ્રામ પંચાયતોની ચૂંટણી ૨૭ ડિસેમ્બરના રોજ યોજાયેલ હતી જેમાં ૭૭.૪૪ ટકા મતદાન થયેલ હતું.

          ગ્રામ પંચાયતોની ચૂંટણીનું શાંતિપૂર્ણ વાતાવરણમાં સંપન્ન થયેલ મતદાન બાદ ગુરુવાર તારીખ.૨૯ ડિસેમ્બરના રોજ સવારથી જ મત ગણતરી પ્રક્રિયા ગરબાડા માધ્યમીક શાળા ખાતે ચુસ્ત પોલીસ બંદોબસ્ત વચ્ચે ઉમેદવારો અને એજન્ટોની ઉપસ્થિતિમા હાથ ધરાઈ હતી જેમાં સવારથી ઉમેદવારો અને તેમના સમર્થકોના ટોળેટોળા મત ગણતરી મથક ઉપર ઉમટી પડતાં હૈયેહૈયું દબાય તેટલી ભીડ જોવા મળી હતી. જેમ જેમ પરિણામો જાહેર થતાં ગયા તેમ તેમ વિજેતા ઉમેદવારોના સમર્થકોએ વિજયી ઉમેદવારોને ફુલહાર પહેરાવી આનંદ ઉત્સાહ અને હરખ સાથે અબિલ ગુલાલ ઉડાવીને વધાવી લીધા હતા અને ડીજેના તાલે વિજય સરધસ સાથે તેમના ગામ તરફ પ્રયાણ કર્યું હતું. જ્યારે હારેલા ઉમેદવારો વીલા મોએ પરત ફર્યા હતા. બેલેટ પત્રથી મતદાન થયું હોવાથી મત ગણતરી મોટી રાત સુધી ચાલતા ઉમેદવારો અને તેમના સમર્થકોના ટોળેટોળા મોડી રાત સુધી પણ જોવા મળ્યા હતા.

        મત ગણતરી મથકે તથા મત ગણતરી દરમ્યાન કોઈપણ જાતનો અનિચ્છનીય બનાવ બનેલ ન હતો અને મત ગણતરી શાંતિમય વાતાવરણમાં સંપન્ન થતાં ચૂંટણી વહીવટી તંત્રએ તેમજ પોલીસ તંત્રએ રાહતનો દમ લીધો હતો.