દાહોદ જિલ્લાના ફતેપુરા તાલુકાના મુખ્ય મથક ફતેપુરા નગરમાં ઠેર ઠેર સ્ટોલ ઉભા કરી અને દુકાનો ખોલી વેચાણ કરતા કેરીના જ્યુસની તપાસ માટે ખોરાક અને ઔષધ અને નિયમન તંત્ર દાહોદ દ્વારા ઓચિંતી તપાસ કરવામાં આવી હતી.
ફતેપુરા તાલુકાના મુખ્ય મથક ફતેપુરા, કાળિયા વલુંડા, કરોડિયા પૂર્વ ખાતે બજારોમાં પરવાનગી લીધા વગર ગેરકાયદેસર ચાલતા કેરીના જ્યુસ સેન્ટરો પર તપાસ કરતા બિન આરોગ્યપ્રદ જ્યુસ, ફૂડ કલર મળી આવેલ તેમજ તમામ જ્યુસ સેન્ટરો ચલાવનાર બીજા રાજ્યના યુપી, બિહારના જણાઈ આવતા તેમની પાસે જ્યુસ સેન્ટર ચલાવવાનું લાઇસન્સ, ભાડા કરાર પંચાયતમાં નોંધણી તેમજ પોલીસ સ્ટેશનનું રજીસ્ટ્રેશન માંગતા એક પણ પુરાવા મળી આવેલ નથી. જેમાં ૧૪ જેટલા સ્ટોલની તપાસ કરતા કેરીના જ્યુસ અને જ્યુસ બનાવવા માટે વપરાતા મટિરિયલની ગુણવત્તા બાબતે તપાસ કરી અને કેરીના જ્યૂસના કુલ ૧૧ નમૂના લઈ ચકાસણી માટે લેબોરેટરીમાં મોકલયા. જેમાં સ્થળ તપાસ દરમિયાન અખાદ્ય કેરી, તૈયાર કરેલ મેંગો જ્યુસ, ચાસણી તેમજ કલર સહિત અંદાજિત ૮૦ લીટર જેટલો અખાદ્ય જથ્થો જણાઈ આવતા સ્થળ પર જ નાશ કરેલ. તેમજ સ્વચ્છતા જાળવવા કેપ, એપ્રોન પહેરવા સૂચન કરેલ.
વધુમાં જેઓ પાસે ફૂડ સેફ્ટી એક્ટ અંતર્ગત રજીસ્ટ્રેશન સર્ટિફિકેટ નથી મેળવ્યું તેઓને રજીસ્ટ્રેશન સર્ટિફિકેટ ન મેળવે ત્યાં સુધી ધંધો બંધ રાખવા જણાવેલ.
