આગામી ચૂંટણીમાં મતદારો કોને વિજયમાળા પહેરાવશે તેની અટકળોનો દોર શરૂ
દાહોદ જિલ્લા પંચાયત અને તાલુકા પંચાયતની ચૂંટણી નજીક આવી રહી છે ત્યારે સમગ્ર સંજેલી તાલુકામાં રાજકીય માહોલ ગરમાયો છે ત્યારે દાહોદ જિલ્લા પંચાયતની 10 – ચમારીયા બેઠકમાં કુલ બે મહિલા ઉમેદવાર ભાજપ અને કોંગ્રેસ સામ સામે, જયારે 18 – હિરોલા બેઠકમાં કુલ 3 ઉમેદવારોનો આમને સામને જંગ જોવા મળશે જેમાં ભાજપ, કોંગ્રેસ અને આમ આદમી પાર્ટી નો ત્રિ-પાંખીયો જંગ જોવા મળશે.
દાહોદ જિલ્લા પંચાયતની ચૂંટણીને લઈને રાજકીય ગરમાવો જોવા મળી રહ્યો છે ત્યારે ભારે રસાકસી ભરી રહેનારી આ ચૂંટણીને લઈને અનેક અટકળોના ઘોડા દોડી રહ્યા છે ત્યારે 10 – ચમારીયા બેઠકની દાહોદ જિલ્લા પંચાયતની (અનુસૂચિત આદિજાતિ સ્ત્રીઓ માટે અનામત) એવી આ બેઠક પર માત્ર બે ઉમેદવાર વચ્ચે સીધો જંગ છે, જેમાં માંડલી ગામના (1) કાંતાબેન જશુભાઈ બામણીયાએ ભાજપ માંથી ઉમેદવારી નોંધાવી છે, જયારે (2) ઢેડીયા ગામના નયનાબેન મુકેશભાઈ રાઠોડ કોંગ્રેસ પાર્ટીમાંથી ઉમેદવારી કરી છે. ત્યારે ઉલ્લેખનીય છે કે આ બેઠક પર કોઈ અપક્ષ ઉમેદવાર નથી કે આમ આદમી પાર્ટી (ઝાડું વાળા) ના ઉમેદવાર મેદાનમાં નથી ત્યારે બે ઉમેદવારો વચ્ચે ભારે રસાકસી ભરી ચૂંટણી રહેશે. જયારે દર પાંચ વર્ષે ખુબ જ ચર્ચામાં રહેતી એવી દાહોદ જિલ્લા પંચાયતની18 – હિરોલા બેઠક માં કુલ 3 ઉમેદવારોનો જંગ ( અનુસૂચિત આદિજાતિ) જામનારો છે. જેમાં (1) ભુપેન્દ્ર ભાઈ કાળુભાઇ સંગાડા – ભાજપ, (2) વનીતાબેન ભૂરકાભાઈ સંગાડા – કોંગ્રેસ તથા (3) રાજેન્દ્રસિંહ કાળુભાઇ બારીઆ – AAP.
આમ દાહોદ જિલ્લા પંચાયતની બેઠકો માટે ઉમેદવારોએ પોતાના ચૂંટણી પ્રચારના શ્રી ગણેશ કરી દીધા છે ત્યારે આગામી તા 26 એપ્રિલના રોજ યોજાનારી તાલુકા અને જિલ્લા પંચાયની ચૂંટણીમાં સંજેલી તાલુકાના મતદારો કોને કોને જીતની રેસમાં આગળ લાવશે તે જોવું રહ્યું
